ශ්‍රී ලංකාවෙන් බරවා රෝගය සම්පූර්ණයෙන් තුරන් කිරීම සඳහා, සියුම් ලෙස සලකා බලන ලද සාක්ෂි පදනම් කරගත් උපාය මාර්ගික හා තාක්ෂණික මාර්ගෝපදේශ සැපයීම සහ නිර්දේශ සැපයීම සඳහා, සෞඛ්‍ය සේවා අධ්‍යක්ෂ ජනරාල්තුමා විසින් තාක්ෂණික උපදේශක කමිටුව (TAG) පත් කර ඇත.
පරපෝෂිතවේදය, වසංගතවේදය, ඖෂධවේදය, වෛද්‍ය විද්‍යාව, ශල්‍ය වෛද්‍ය විද්‍යාව, චර්ම රෝග විද්‍යාව, මහජන සෞඛ්‍ය සහ වාහක පාලනය ඇතුළු බරවා රෝග පාලනයට සහ තුරන් කිරීමට අදාළ ක්ෂේත්‍රවල පුළුල් පරාසයක විශේෂඥ දැනුමක් ඇති ස්ථිර සාමාජිකයින් 17 දෙනෙකුගෙන් මෙම කමිටුව සමන්විත වේ. බරවා මර්දන ව්‍යාපාරය වෙත ප්‍රවීණතාව සහ මගපෙන්වීම ලබා දීම සඳහා ඔවුන්ගේ ඇති හැකියාව මත, මූලික වශයෙන් සාමාජිකයින් තෝරාගෙන ඇත. මෙහි සභාපතිත්වය සෞඛ්‍ය සේවා අධ්‍යක්ෂ ජනරාල්තුමා විසින් දරනු ලබන අතර සෞඛ්‍ය අමාත්‍යාංශයේ සාමාජිකයින් ලෙස බරවා මර්දන ව්‍යාපාරයේ මූලස්ථානයේ වෛද්‍ය නිලධාරීන් මෙන්ම ප්‍රාදේශීය බරවා මර්දන ඒකක වල වෛද්‍ය නිලධාරීන් ද ද මෙම කමිටුවට ඇතුළත් වේ.
සෞඛ්‍ය සේවා අධ්‍යක්ෂ ජනරාල්තුමා සහ බරවා මර්දන ව්‍යාපාරයේ අධ්‍යක්ෂතුමා වෙත උපදෙස් සහ නිර්දේශ සැපයීම සඳහා මෙම කමිටුව, හුදෙක් උපදේශන ධාරිතාවකින් ක්‍රියා කරයි. සෞඛ්‍ය අමාත්‍යාංශය විසින් කමිටු රැස්වීම් සහ ඊට අදාළ ක්‍රියාකාරකම් සඳහා පහසුකම් සහ සම්පත් සපයයි. කමිටුවෙහි සාමාජිකත්වය සෑම වසර 3 කට වරක් සමාලෝචනය කර සංශෝධනය කෙරේ. මෙම කමිටුව වසරකට දෙවතාවක් කලින් තීරණය කළ දිනයක කැඳවනු ලබන අතර, ඊට අමතරව, අවශ්‍ය නම් අමතර රැස්වීම් කැඳවිම සිදු කල හැකිය.
තාක්ෂණික උපදේශක කමිටුවෙහි කාර්යභාරය
- බරවා රෝගය තුරන් කිරීම සඳහා ක්‍රියාත්මක වීමේදී, රෝගය හඳුනා ගැනීම සහ රෝග විනිශ්චය සඳහා ඇති ශක්තීන්, දුර්වලතා, අභියෝග සහ ඉඩප්‍රාස්තා හඳුනා ගැනීම සහ නිර්දේශ ඉදිරිපත් කිරීම
- බරවා රෝගය සම්බන්ධ ප්‍රතිකාර, රෝග කළමනාකරණය සහ වැළැක්වීමේ අංශවල ගැටළු හඳුනාගෙන නිර්දේශ ඉදිරිපත් කිරීම
- ලෝක සෞඛ්‍ය සංවිධානයේ වැඩසටහන් සමාලෝචනය/මෙහෙයුම් මගින් ලබා දී ඇති නිර්දේශ වලට අනුගත වීමේදී සහ එම නිර්දේශ ක්‍රියාත්මක කිරීමේදී පැන නගින ගැටළු හඳුනා ගැනීම සහ එවැනි ගැටළු මඟහරවා ගැනීම සඳහා නිර්දේශ ඉදිරිපත් කිරීම
- බරවා රෝගය සම්බන්ධයෙන් ජාතික වශයෙන් වැදගත්වන සහ කාලීන වශයෙන් අවශ්‍ය වන මෙහෙයුම් පර්යේෂණ සහ පුහුණු අවශ්‍යතා හඳුනාගෙන නිර්දේශ ඉදිරිපත් කිරීම
- අවශ්‍ය විටෙක ප්‍රතිපත්ති, මාර්ගෝපදේශ, සංකල්ප පත්‍රිකා සහ ප්‍රදාන ඉල්ලුම කිරීම් යනාදිය සැකසීමේදී තාක්ෂණික මග පෙන්වීම/ නිර්දේශ සැපයීම
- විශේෂ ක්‍රියාකාරී කණ්ඩායම් සහ කමිටු සමාලෝචනය කර නිර්දේශ ඉදිරිපත් කිරීම
- ක්‍රියාකාරකම්වල ප්‍රමුඛතාවය තීරණය කිරීමට අවශ්‍ය වන නිර්දේශ ඉදිරිපත් කිරීම
- වැඩසටහන් ක්‍රියාත්මක කිරීම සහ තුරන් කිරීමේ ඉලක්ක සපුරා ගැනීම පිළිබඳ නිර්දේශ සැපයීම